نړیواله امنیت شورا د افغانستان په اړه ځانګړې غونډه کوي

تاند:( سې شنبه، د عقرب يوولسمه) ټاکل شوې، چې د روانې میلادي میاشتې په اوولسمه د ملګرو ملتونو امنیت شورا د افغانستان په اړه ځانګړې غونډه وکړي.
د دې غونډې د ترسره کیدو خبر په ملګرو ملتونو کې د مکسیکو ځانګړي استازي ورکړی.
هغه د روسیې ټاس خبري اژانس ته ویلي، چې د افغانستان ترڅنګ نړیواله امنیت شورا په روانه میاشت کې د سوريې او یمن په اړه هم د ځانګړو غونډو پلان لري.
د افغانستان په اړه د اعلان شوې دغې غونډې په تړاو نور جزییات نه دي ورکړل شوي.
افغانستان د طالبانو له واکمنیدو وروسته، له سخت اقتصادي او بشري ناورین سره مخامخ دی.
ملګرو ملتونو خبرداری ورکړی، چې د افغانستان تر نیمایي ډېر وګړي(۲۳ میلیونه) د لوږې له سخت خطر سره مخ دي او ممکن ۳ میلیونه ماشومان( له ۵ کلونو څخه کم عمره) د دغه ناورین په ترڅ کې مړه شي.
د ملګرو ملتونو سرمنشي تېره اونۍ په یوه ټویټ کې اندیښنه وښوده، چې افغانستان به د دغه وضعیت له دوام سره د نړۍ په تر ټولو سترې فاجعې بدل شي.
څه موده مخکې د نړۍ شلو صنعتي هېوادونو له افغانستان سره د شاوخوا یو میلیارد ډالره مرستې اعلان وکړ، خو طالبان وایي چې تراوسه دا مرسته افغانستان ته نه ده رسول شوې او باید ورسول شي.
طالبان، چې اداره یې د واکمنۍ له درې میاشتیني کیدو سره لا هم د تر ټولو نیږدې متحد او مدافع پاکستان په ګډون یې هیڅ یوه هېواد په رسمیت نه ده پېژندلې، د بشري ناورین د مقابلې لپاره د کرنې وزارت د غنمو ستراتیژیکې زېرمې سپړلي او د مزدورۍ په بدل کې یې پر خلکو وېشي.
دا څه باندې ۵۰ زره ټنه غنم د افغانستان وروستۍ اسره ده، چې که زر تمامه شي، له خونړۍ ژمي، بې معاشۍ او د طالبانو له واکمنیدو وروسته د ۱۸میلیونه خلکو وزګاریدو ته بله اسره نه پاتې کیږي.
پرون، سي این این ټلویزون په یوه مستند ټلویزوني راپور کې د یوې افغانې نجلۍ ژوند رسنیز کړ، چې د لوړو زده کړو او معلمۍ هیله منه وه، خو اوس یې کورنۍ د ۲ سوه زره افغانیو په بدل کې له ډېرې بې وسۍ پلورلې ده.