تاند:( يکشنبه، د عقرب نهمه) په ننګرهار کې د طالبانو د اسلامي امارت چارواکي وايي، چې په دې ولايت کې ۶۵ داعشیان ورته تسليم شوي دي.
د دوی په وینا، ياد شوي داعشیان د کوټ او بټي کوټ ولسواليو د قومي مخورو په منځګړيتوب ورته تسليم شول.
طالبانو ادعا کړې، چې ورته تسليم شويو کسانو په خپلو تېرو کړنو يې پښيماني وښوده.
په ننګرهار کې د طالبانو د استخباراتو مشر ډاکتر بشير وايي که یاد کسان بیا ځل دولت ضد فعالیتونو ته مخه کړي قانوني چلند سره به مخ شي.
هغه څه موده مخکې، دوی ته د ۵۰ نورو داعشیانو د تسلیمیدو خبر هم ورکړی و.
داعش ډلې د طالبانو دا ډول ادعاوو ته کوم غبرګون نه دی ښودلی.
په وروستيو کې د افغانستان له مختلفو سيمو څخه د داعش ډلې د فعالیتونو د پراختیا خبرونه ورکول کېږي.
د طالبانو په ضد د مقاومت عالي شورا یوه غړي حاجي محمد محقق پرون وویل، چې داعش ډله به زر د طالبانو له منځه خپل بيرغونه پورته او د دې ډلې خلاف خپلو جګړو ته زور ورکړي.
طالبانو بيا داعش یوه مزاحمتي ډله ګڼلې او ويلي، چې جدي ګواښ نه دی.
خو د متحده ايالاتو او روسیې په ګډون ګڼ مهم قدرتونه په افغانستان کې د داعش ډلې د پياوړتيا او پراختيا په اړه پرله پسې انډيښنې څرګندوي.