تاند:( يکشنبه، د عقرب نهمه) د طالبانو د اسلامي امارت ویاند او د اطلاعاتو او فرهنګ وزارت د خپرونو چارو معینیت سرپرست ذبیح الله مجاهد، یوشمېر  هېوادونو ته د خپل رژيم د پلاوو د سفرونه پایلې له رسنیو سره شریکې کړې.
مجاهد وویل چې د طالبانو د امارت مسوولین شپه او ورځ د نړۍ له بېلابېلو هېوادونو سره په اړیکه کې دي چې د اسلامي امارت او د نړۍ هېوادونو ترمنځ د اعتماد او باور فضا رامنځته کړي.
مجاهد زیاته کړه چې له څو استثنايي مواردو پرته په ټول هېواد کې امنیت تامین شوی دی او د دوی اړوند ارګانونه د امنیت د لا ټینګښت او اقتصادي ودې په خاطر کار او هڅې کوي.
هغه څرګنده کړه چې په تېرو ۲۰ ورځو کې د طالبانو اسلامي امارت پلاوو ایران، قطر ازبکستان، مسکو او نورو هېوادونو ته سفرونه وکړل چې ښې پایلې او لاسته راوړنې يې لرلې.
مجاهد څرګنده کړه چې له ایران لوري سره د افغانانو د تګ راتګ، ترانزیتي مسئلو او زیاتو تعاملاتو په اړه خبرې وشوې چې یاد هېواد د همکارۍ ژمنه وکړه. دغه راز د طالبانو اسلامي امارت پلاوي دوست هېواد قطر ته سفر وکړ چې له افغانستان سره د دغه هېواد مرستې، همکارۍ او اړیکې ډېرې مهمې دي.
د مجاهد د څرګندونو له مخې؛ ازبکستان ته د طالبانو اسلامي امارت د پلاوي په سفر کې له دغه لوري سره د سرحدي امنیت، د ګمرکي تعرفو د کمښت او د ترانزیت په برخه کې سوداګرو ته د زیاتو آسانتیاوو د برابرولو په اړه خبرې وشوې او دغه سفر ښې لاسته راوړنې درلودې، دغه راز ازبکستان ژمنه کړې ده چې د برېښنا لګښت یوڅه پور به معاف کړي او د پاتې پور د ورکولو موده به وغځوي او د اوسپنې پټلۍ پروژې په اړه چې هېواد ته ډېر اقتصادي ارزښت لري، د همکارۍ ژمنه وکړه.
د طالبانو د اسلامي امارت ویاند همدارنګه مسکو ته د دوی د پلاوي سفر ته اشاره وکړه او ویې ویل چې د مسکو په فارمټ غونډه کې د درېو مهمو مسئلو یادونه وشوه: د افغانستان د اوسني امنیت ساتنه، د افغانستان د خلکو د کنګل شویو پیسو آزادېدل او د افغانستان د نوي نظام ملاتړ او له نورو هېوادونو سره د اړېکو ټینګښت.
هغه څرګنده کړه چې له پاکستان سره د افغانانو د تګ راتګ په خاطر د دروازو خلاصېدل او ترانزیتي مسئلې شریکې شوې دي چې دغه ستونزې تر یوه بریده حل شوې دي او نورې به يې ډېر ژر حل شي.
مجاهد په قطر کې د چین د بهرنیو چارو له وزیر سره د طالبانو د پلاوي د کتنې پایلې مثبت وبللې او څرګنده یې کړه چې دغه هېواد د افغانستان د وچو میوو په صادراتو کې له افغانستان سره همکاري کوي.
ذبیح الله مجاهد په قطر کې د امریکا په ګډون د ۱۴ اروپايي هېوادونو له سفیرانو سره د دوی امارت د پلاوي غونډه یوه مهمه سیاسي غونډه یاده کړه او ویې ویل چې په دې غونډه کې طالبانو په سیاسي برخه کې د همکارۍ غوښتنه وکړه چې هغوی د همکارۍ او تعامل ژمنه وکړه.
ذبيح الله مجاهد د ټاپي پروژې په اړه معلومات ورکړل او ویې ویل چې د دغې مهمې پروژې کار په ډېر ژر پیل شي او د نورو اقتصادي ښيګڼو ترڅنګ به ۱۲ زره کسانو ته په دوامدار ډول د کار زمینه برابره شي.