تاند:( شنبه، د عقرب اتمه)د ايران د صدا او سیما ټلویزیون کامره مین علیی رضا شریفي، پرون مازيګر په کابل کې د ناڅرګندو وسله والو په یوه وسله وال برید کې سخت ټپي شوی دی.
ويل شوي، چې پر نوموړي دوو موټر سايکل سپرو کسانو ډزې کړي دي.
دا ایرانی کامره مین د ډزو پر وخت ۷ ډزه لګیدلی او بريدګر وروسته تښتیدلي دي.
نوموړی تېره شپه په یوه روغتون کې تر درملنې لاندې و.
معلومه نه ده، چې اوس د نوموړي روغتيايي وضعيت څنګه دی؟
د طالبانو له واکمنیدو راهيسې، دا لومړی ځل دی چې يو ايرانی مطبوعاتي فعال له ورته پېښې سره مخ کیږي.
تر دې مخکې، د طالبانو له واکمنیدو سره په افغانستان کې د ۱۲۰ په شاوخوا کې د افغان خبریالانو پر وړاندې د تاوتريخوالي د مختلفو پېښو خبرونه ورکړل شوي.
طالبانو په دې اړه څه نه دي ويلي.
پر دوی نیوکه ده، چې د نورو اتباعو ترڅنګ یې افغان خبریالان هم له هدفي وژنو او پېښو نه دي ژغورلي.
په ډېرو برخو کې د داسې پېښو پړه خپله پر طالبانو اچول کيږي، خو دوی یې مسووليت نه مني.