تاند:( شنبه، د اکتوبر ۲۳ مه) د طالبانو د کورنيو چارو وزارت وياند قاري سعید خوستی وايي، چې د کابل په مراد بيګ سيمه کې د برېښنا پایو د الوزولو په تور ۳ کسان نیول شوي دي.
نوموړي په دې اړه نور جزییات نه دي ورکړي، خو ويلي چې له نیول شویو کسانو څخه پلټنې روانې دي.
د کابل په مراد بيګ سيمه کې د تېرې چارشنبې په ورځ له منځنۍ اسيا څخه د را وارد شوې بريښنا پايې الوزول شوي، چې د پلازمېنې کابل په ګډون يو شمېر ولايتونه ورسره تياره شوي دي.
داعش ډلې په یوه اعلامیه کې د دې پېښې مسووليت پر غاړه اخيستی دی.
په ټولنیزو رسنیو کې د پرې شوې بريښنا په فعالولو کې د پاتې راتلو له کبله یو شمېر کسانو پر طالبانو توندې نیوکې کړي.
دوی ويلي: د بریښنا د پايو الوزول همدې طالبانو پیل کړي، چې اوس داعش دوام ورکوي او طالبان یې له رغولو څخه عاجز دي.
طالبانو د خلکو نیوکو ته غبرګون نه دی ښودلی.
دوی دا هم نه دي ويلي، چې د بريښنا مزې ولې په دومره وخت کې بیرته ونه تړل شول؟
مخکې د بریښنا د پايو په بيرته فعالولو کې د ځنډ دليل د پېښې په ځای کې امنيتي ننګونې ګڼل کیدې.
اوس معلومه نه ده، چې طالبان هم د داعش له وېرې د کابل ښار مراد بيګ سیمې ته تخنيکي ټيمونه نه شي استولی که بله ستونزه لري؟