تاند:( پنج شنبه، د ميزان نهه ويشتمه) د افغانستان په اړه د مسکو ناستې په څنډه کې د طالبانو د اسلامي امارت د رئيس الوزرا مرستيال مولوي عبدالسلام حنفي د يوه پلاوي په ملتيا د افغانستان، ايران او پاکستان لپاره د هندوستان له مسوول جي پي سينګ سره ليدلي دي.
د طالبانو وياند ذبيح الله مجاهد وايي چې په دې ليدنه کې دواړو لورو توافق کړی، چې د يو بل اندیښنې به په پام کې نيسي او ديپلوماتيکې او اقتصادي اړیکي به رغوي.
مجاهد دا هم ويلي، چې هندي لوري له افغانستان سره د پراخو بشري مرستو ډاډ هم ورکړی.
بلخوا: هندوستان ټایمز ورځپاڼې په يوه راپور کې د دې ليدنې له خبر خپرولو سره د يوې سرچينې په حواله ویلي، چې د طالبانو د وياند څرګندونې په دې تړاو دقیقې نه دي.
خپله يادې ورځپاڼې د دغې ليدنې د جزيياتو په اړه څه نه دي ويلي.
هندوستان د طالبانو له واکمنیدو سره، په دغه هېواد کې د ترهګرو ډلو له بيا فعاليدو او دغه راز پر طالبانو د پاکستان پراخ نفوذ ته په کتو سره، د هندوستان پر ضد د افغان خاورې له استفادې څخه انديښمن دی.
د طالبانو د رئيس الوزرا مرستيال مولوي عبدالسلام حنفي د مسکو ناستې په ترڅ کې هم نړيوالو ته ډاډ ورکړ، چې د افغانستان خاوره به د هيچا خلاف ونه کارول شي.
نړيوالو بيا طالبانو سره په تعاملاتو کې د خبرو پر ځای د دوی عملي ګامونه معيار ګرځولي او د هغو په اساس يې ورسره په متقابل چلند ټينګار کړی دی.