تاند:( پنجشبه، د ميزان دوه ویشتمه) روسيې تاييد کړه، چې راتلونکې اونۍ به يې پلازمېنه ماسکو کې د افغانستان په اړه را بللې غونډه ترسره شي.
د روسیې د بهرنیو چارو وزارت وياندې رسنيو ته ويلي، چې په دې غونډه کې به د طالبانو يو پلاوی ګډون وکړي.
ويل شوي، چې دغه ناسته به مشورتي بڼه ولري.
وياندې ماریا زاخارووا نه دي ويلي، چې په دې غونډه کې به د نورو هېوادونو يا افغان لوريو استازي هم ګډون وکړي کنه؟
طالبانو په دې اړه تراوسه څه نه دي ويلي.
روسيه مخکې هم د افغانستان په اړه د يو شمېر ناستو کوربه توب کړی و، چې طالب او د مخکيني جمهوري نظام استازو پکې ګډون کړی و.
په وروستيو کې مختلف هېوادونه او په خاص ډول روسیه او امریکا متحده ایالات د افغانستان په اړه په سیالۍ سره ښکاري، څو پر طالبانو او د افغانستان پر راتلونکي ډېر اغېز ولري.
همدا اونۍ د متحده ايالاتو د بهرنيو چارو وزارت مرستیالې میرمن وندي شرمن د يوه پلاوي په مشرۍ د قطر په پلازمېنه دوحه کې د طالبانو د بهرنيو چارو وزارت د سرپرست وزیر امیر خان متقي په مشرۍ د طالبانو له يوه پلاوي سره دوه ورځيني مذاکرات وکړل.