تاند (جمعه، د میزان ۱۶) د بخښنې نړیوال سازمان د ملګروملتو د بشري حقونو د شورا له لوري افغانستان ته د ځانګړي راپورتر د ټاکلو هرکلی وکړ، ویې ویل چې دا په افغانستان کې د بشري حقونو پر وضعیت د ملګروملتو د قوي څارنې لور ته لومړنی مهم ګام دی.
د ملګروملتو د بشري حقونو شورا پرون (پنجشنبې) د افغانستان لپاره د یوه ځانګړي راپورتر پر ټاکلو سلا وکړه څو په دې هیواد کې د طالبانو او نورو ښکېلو خواوو د سرغړونو په هکله پلټنې وکړي.
دا پرېکړه د چین، پاکستان او روسیې په شمول د ۵ مخالفو رایو په وړاندې په ۲۸ موافقو رایو تصویب شوه.
د افغانستان لپاره ځانګړی راپورتر به په مارچ میاشت کې کار پیل کړي او ملګري ملتونه به د حقوقي مسلو د څېړنې، عدلي طب او د ښځو د حقونو په برخو کې د متخصصانو مرسته ورسره وکړي.
د دغه راپورتر ټاکل د ملګروملتو له لوري د بشري حقونو د وضعیت د څارلو د پیاوړتیا لور ته یو مهم لومړنی ګام بلل شوی دی.
خو د بخښنې نړیوال سازمان ویلي، په افغانستان کې د بشري حقونو د بحران شدت ته په کتو د امنیت شورا پرېکړه لیک هغسې کلک ځواب نه دی چې د بشري حقونو د شورا له لوري یې دوی تمه لرله.
د بخښنې نړیوال سازمان همداراز ویلي چې یو نړیوال او خپلواک میکانیزم چې د اسنادو او شواهدو د ټولولو توان ولري، ډېر مهم دی.
د ملګروملتو د بشري حقونو شورا وروسته له دې د افغانستان لپاره ځانګړی راپورتر وګوماره چې په سپټمبر کې د بخښنې نړیوال سازمان له ۵۰ نورو سیمه ییزو او نړیوالو موسسو سره یوځای د ملګروملتو له غړیو هیوادونو وغوښتل چې په افغانستان کې د بشري حقونو د سرغړونو په اړه د پلټنو لپاره یو حقیقت موندونکی یا دې ته ورته کوم استازی وټاکي.