تاند:( جمعه، د ميزان شپاړسمه) د امريکا متحده ايالاتو د بهرنيو چارو وزارت مرستيالې ویندی شیرمن پاکستان ته د سفر پر مهال د دغه هېواد له چارواکو سره د افغانستان په اړه خبرې کړي دي.
د پاکستان د بهرنيو چارو وزارت په يوه اعلاميه کې راغلي، چې مېرمن شيرمن د دغه سفر په ترڅ کې د پاکستان د بهرنيو چارو له وزیر شاه محمود قريشي سره ليدلي او د افغانستان په اړه يې بحث او د نظرونو تبادله ورسره کړې ده.
د اعلامیې له مخې، دواړو لوريو په سيمه کې د وروستي بدلونونه او دوه اړخيزې اړيکې هم بحث کړي.
د پاکستان د بهرنيو چارو وزارت په اعلامیه کې د امريکا د بهرنيو چارو وزارت د مرستیالې په حواله لیکل شوي، چې امريکا او پاکستان د افغانستان په اړه ګډ لیدلوری لري.
پاکستان زیاته کړې، چې د کابل له نوې ادارې څخه تمه لري، څو د امنيت او ثبات د ټينګښت ترڅنګ د ټولو افغانانو د ژوند د ښه والي لپاره کار وکړي.
خپله مېرمن شيرمن بيا پر خپل ټویټر ليکلي، چې اسلام اباد ته د سفر په ترڅ کې يې د افغانستان د وضعیت او راتلونکي په اړه د پاکستان د بهرنيو چارو وزير شاه محمود قريشي سره خبرې وکړې.
مخکې نوموړې په يوه بل ټویټ کې لیکلي وو، چې د پاکستان د ملي امنیت امنيت له سلاکار سره يې د متحده ايالاتو او پاکستان د همکارۍ د ساحې په اړه خبرې اترې کړي دي.
دغې لوړپوړې امريکايي ديپلوماتې له پاکستان څخه مخکې هندوستان ته سفر کړی و.
د سفر په جریان کې نوموړې ويلي وو، چې د افغانستان په اړه له هندوستان سره ګډ ليدلوری لري.