تاند(پنجشنبه، د اکتوبر ۷مه) له نن څخه ۲۰ کاله پخوا د ۲۰۰۱ کال د اکتوبر په اوومه د امریکا متحدو ایالتونو د خپلو نژدې متحدانو په همکارۍ په افغانستان کې پر طالبانو یرغل پیل کړ.
د دې برید هدف ظاهراً د القاعده شبکې له منځه وړل او دې شبکې ته د پناه ورکولو په خاطر طالبانو ته د سزا ورکول و ځکه چې القاعده شبکې د ۲۰۰۱ م کال د سپټمبر په یوولسمه په امریکا کې تروریستي بریدونه کړي وو.
طالبانو هماغه مهال د افغانستان له ۹۰ تر ۹۵ سلنه خاوره په کنټرول کې لرله او له شمال ټلوالې سره په جګړه کې ښکېل وو.
د امریکا د هماغه وخت ولسمشر د سپټمبر د یوولسمې له حملو وروسته له طالبانو وغوښتل چې د القاعده شبکې مشر اسامه بن لادن وروسپاري یا یې له افغانستانه وباسي خو طالبانو له دواړو غوښتنو انکار وکړ او د امریکا په حملو کې یې د شواهدو غوښتنه وکړه. امریکا د طالبانو غوښتنه بې معنا وبلله او د اکتوبر په اوومه یې د تلپاتې ازادۍ په نوم عملیات پیل کړل. په دې عملیاتو کې له امریکا سره بریتانیا شریکه وه. له دوی سره وروسته د ناټو د نورو غړیو هیوادونو ځواکونه ملګري شول او طالبان یې د دسمبر په ۱۷ مه وپرزول. د طالبانو او القاعده اکثره مشران ګاونډي پاکستان ته لاړل. د القاعده شبکې مشر اسامه بن لادن وروسته له دې چې د ننګرهار ولایت په توره بوړه کې د محاصرې کړۍ پرې تنګه شوه، پاکستان ته وغورځېد.
د طالبانو د رژیم له پرزېدو وروسته امریکا او ايتلافي ځواکونو یې د افغانستان په اکثرو لویو ښارونو کې اډې جوړې کړې.
په دسمبر کې د ملګروملتو امنیت شورا د (ISAF) ایساف په نوم نړیوال امنیت ساتونکی ځواک جوړ کړ چې په پیل کې یوازې په کابل کې مېشت و. دغه ځواک د امنیت ساتنې ترڅنګ افغان امنیتي ځواکونه روزل.
په همدې میاشت (دسمبر) کې د جرمني په بون کې د افغانانو په یوه کنفرانس کې، چې اکثره برخوال یې د شمال ټلوالې غړي وو، حامد کرزی د افغانستان د موقت حکومت مشر وټاکل شو. په ۲۰۰۲ کې په کابل کې لویې جرګې، چې خیمه ورته له جرمني څخه راوړل شوه او لا هم د کابل په پولیتخنیک پوهنتون کې شته، انتقالي حکومت تصویب کړ. دغه حکومت په ۲۰۰۴ م کال د افغانستان په تاریخ کې د ولسمشرۍ لومړني انتخابات ترسره کړل چې حامد کرزي وګټل.
د بون په کنفرانس کې، هم طالبان او هم د حکمتیار اسلامي حزب له پامه وغورځول شول چې دا د ډېرو په باور ورپسې جګړو ته لار هواره کړه.