تاند (چهارشنبه د عقرب ۳۰مه) د طالبانو د حکومت د کرنې اوبو لګولو او مالدارۍ وزیر کابل کې د جاپان سفیر سره په لیدنه کې د جاپان حکومت د کرنې او مالدارۍ برخه کې د همکاریو او ناکامورا د پروژو پر پلي کولو خبرې کړې دي.

د طالبانو د کرنې اوبو لګولو او مالدارۍ وزیر مولوي عطاء الله عمري ویلي، کلک هوډ لري چې د جاپان مرستې په اغېزناک ډول وکاروي څو بزګران او مالداران ترې ګټه پورته کړي.

نوموړي د نشه یي توکو د بدیل کښت لپاره د بزګرانو د ملاتړ او د هغو پر ځان بسیا کېدو سره د مرستې ترڅنګ د ډاکټر تیتسو ناکامورا د پروژو د پلي کولو غوښتنه هم کړې ده.

په دې لیدنه کې د جاپان سفیر تاکایوشي کورومایا ویلي، جاپان به په بدیل معیشت، غلو، سبزیجاتو، د مخدره موادو پر وړاندې مبارزې، د ناکامورا پروژو تطبیق او د اوبو لګولو پروژو په برخو کې خپلو فعالیتونو ته دوام ورکړي.

تیتسو ناکامورا چې د تېر جمهوریت پرمهال ی افغانستان کې په ځانګړي ډول ننګرهار کې زرګونه جریبه شاړه ځمکه اباده کړه، چې د همدې خدماتو له وجې د خدایي خدمتګار لقب خپل کړی وو.

نوموړی د تېر جمهوریت پرمهال د ننګرهار ولایت سره په څنګ کې په یوه وسله وال برید کې ووژل شو او پروژې یې نیمګړې پاتې شوې.