ژباړه او راټولونه: ډاکټر عبدالولي اعتماد (د پوستکي او ښکلا معالج)
۱: د مخ پوستکي مو د لمر له وړانګو څخه وساتئ.
۲: له ګرمو، مصاله لرونکو او توندو خوړو ډډه وکړئ.
۳: هڅه وکړئ چې په ډيره ګرمه هوا کې و نه اوسئ.
۴: د پوستکي د متخصص له مشورې پرته هيڅ وخت طبي کريمونه مه استعمالوئ.
۵: دوا مو د پوستکي د متخصص له لارښووني سره سم استعمال کړئ.
۶: د ناروغۍ په پرمختللو حالتو کي کيدای سي د ليزر په واسطه درملنيې ته اړتيا و اوسي چې دا درملنه هم د اعراضو او هم د مخ د سوروالي د درملنې سبب کيږي او د مخ د سطحي رګونو چې په سره رنګ د خطونو په شکل سره ليدل کيږي د درملنې سبب کيږي.
د مخ سوروالی د سټرويډي کريمونو له امله!
د ناروغۍ يو شکل د سترويډي روزاسيا په نامه ياديږي چي د سټرويدي کريمونو (بتامتازون، ترايامسينولون، ديکسامتازون…) د دوامداره استعمال څخه منځ ته راځي، په داسي حالاتو کي د ستروييد استعمال د لنډ مهال لپاره د ناروغۍ د ښه کېدو سبب ګرځي اما کله چي ستروييد قطع سي ناروغي بيرته راپورته کيږي په همدې خاطر ناروغان يادسوي مرهمونه په دوامداره توګه استعمالوي چي نه يواځي د مخ سوروالی منځ ته راوړي بلکه د ستروييد ټول جانبي عوارض لکه د پوستکي نازکېدل، پر مخ اضافه وېښتان، سوروالی او داسي نور حالات منځ ته راوړي، د دې ډول د مخ سوروالی درملنه د سترويد قطع کېدل او دوايي درملنه ده، د ناروغۍ په شديدو حالاتو کي چي د دوايي درملنې په وړاندي د قناعت وړ نه وي کيداي سي د ليزر په واسطه يې درملنه وکړو.