تاند:( سې شنبه، د ميزان دیارلسمه) په افغانستان کې د امريکا او نړيوالو متحدينو له ماموريت ختمیدو سره، په داسې حال کې چې دا ماموريت ناکام او بې ګټې ګڼل کيږي، د جرمني حکومت اعلان کړی، چې په افغانستان کې یې پر شل کلن حضور او پراختیايي پروګرامونه څه باندې شل میلیارده ډالره لګښت درلود.
دغه اعلان نن د جرمني د دفاع وزارت کړی دی.
سرچينې ویلي چې له ۲۰۰۱ کال د ۲۰۲۱ کال تر اګست پورې په بیلابیلو پوځي ماموریتونو ۱۴ میلیارده ډالره لګېدلي.
د جرمني د دفاع وزارت په حواله، په دې پوځي ماموریتونو کې د ایساف، د پایداره ازادۍ عملیات او د ناټو غوڅ ملاتړ ماموریت شامل دي.
بل لور ته، د جرمني د بهرنیو چارو وزارت بیا ویلي چې څه باندې درې نیم میلیارده ډالره بیا په افغانستان کې د جرمني له ملاتړ برخمنو ادارو او پروژو کې د کارکوونکو لپاره معاش ورکړل شوی.
تر اوسه پورې په افغانستان کې د جرمني د فدرال استخباراتو د ادارې د لګښتونو په تړاو څه جزییات نه دي ورکړل شوي.
دا معلومات په داسې مهال خپاره شوي، چې د نړیوالو له وتو او د جمهوري نظام له سقوط سره شنونکي افغانستان بیرته ۲۰ کاله پخواني حالت ته ستون شوی ګڼي.
د دوی په وینا، نړیوال افغانستان ته راغلل، نیمګړي کارونه یې وکړل، د مرستو په حیف و میل کې یې لوی لاس و او افغانستان يې بيرته په داسې وخت کې پريښوده، چې پر خپلو پښو ولاړ نه و او طالبان بيا پرې واکمن شول.
ډېری هغه هېوادونه، چې په افغانستان کې يې ډېرې قربانۍ ورکړي او تاوان یې شوی، اوس یې حکومتونه د خپلو خلکو تر سخت فشار لاندې دي.