تاند:( يکشنبه، د ميزان يوولسمه) د ترکمنستان ولسمشر قربانقلي بردي محمدوف د طالبانو له اسلامي امارت سره همکارۍ ته چمتووالی ښودلی.
نوموړي د طالبانو د واکمنۍ په رسميت پېژندلو ته له اشارې پرته ويلي، چې له طالبانو سره به له نيږدې همکاري وکړي.
د ترکمنستان ولسمشر دا هم ويلي، چې هېواد يې په نورو هېوادونو کې د نه لاسوهنې سياست ته ژمن دی.
هغه په ورته وخت کې هیله مندي ښودلې، چې په افغانستان کې د واک لېږد د پراخو ملي خبرو په پايله کې سر ته ورسيږي.
د محمدوف په خبره، چې ترکمنستان د افغانستان وضعیت له نيږدې څاري.
د ترکمنستان پلازمېنه څو مياشتې وړاندې طالبانو د يوه پلاوي کوربنه وه.
ترکمنستان له طالبانو سره د ټاپي نل لیکې د پروژې بشپړولو ته هیله من ښکاري.
مخکې دغه هېواد له طالبانو څخه د يادې پروژې په امنيت ساتلو کې د مرستې او تضمين غوښتنه کړې وه.
د ټاپي پروژې، چې د عملي کیدو تړون او چارې يې د بې واکه شوي ولسمشر اشرف غني پر مهال پيل شوې وې، پاکستان او هندوستان ته پکې د ترکمنستان ګاز لېږدول کېږي.
طالبانو په مختلفو بڼو د سیمې د یو شمېر هېوادونو د همکارۍ ژمنې او ځينې عملي ګامونه ترلاسه کړي، خو تر اوسه د نیږدې مدافع پاکستان په ګډون يې د هیڅ هېواد لخوا په رسميت نه دي پېژندل شوي.