تاند:( پنجشنبه، د ميزان اتمه) په داسې حال کې چې افغانستان له بېساري اقتصادي او بشري ناورين سره مخامخ دی او خلک طالب چارواکو څخه د دغه وضعيت بدلون ته جدي پاملرنه غواړي، خو طالب چارواکو د تېر نظام پر ضد د خپلو ترانه ویونکو د ستاينې لړۍ پيل کړې ده.
باختر اژانس، چې د طالبانو تر ولکې لاندې نشرات کوي، په یوه راپور کې ويلي، چې د طالب ترانه ویونکو د ستاينې لړۍ په لوګر ولایت کې د ولايت د رهبرۍ په کچه پيل شوې.
نن د لوګر ولايتي ادارې د مولوي عبدالحکیم سجاد په نوم طالب ترانه ویونکي ته د ستاينې مراسم نیولي و، چې د والي د مرستيال تر څنګ امنيه قومندان او ګڼو ملکي چارواکو پکې ګډون کړی و.
په دې غونډه کې د لوګر د والي مرستيال مولوي محمد تايب حنيف ويلي: هغو کسانوچې د شلوکلونوپه بهير کې د اشغالګرو په وړاندې مبارزه او جهاد کړې ده اوقرباني يې
ورکړې، بايد ټول وستايل شي.
د طالبانو رژيم د منتقدینو لخوا ېې تورن دی، چې د حکومتولۍ او لومړیتوبونه یې نه دي پېژندلي او د وږي او تباه کیدونکي ولس له حاله نه دي خبر.
طالب چارواکي بيا ټينګار کوي، چې خلکو ته يې د امنيت زمینه برابره کړې او نورې چارې به د وخت له تېرېدو سره سم شي.
څه موده مخکې د طالبانو د اطلاعاتو او فرهنګ ریاست په ننګرهار کې د نعت ویونکو يوه شورا هم جوړه کړې وه.