تاند:( شنبه، د ميزان درېیمه) هندي چارواکي وایي چې صدراعظم يې نريندر مودي د امریکا د متحد ایالتونو له ولسمشر او نورو مشرانو سره په تازه لیدنو کې موافقه وکړه چې په افغانستان کې د پاکستان د رول ګډه څارنه به کوي.
د هندوستان په باور، اسلام اباد په افغانستان کې د ستونزو محرک دی.
مودي پرون په واشنګتن کې د امریکا له ولسمشر بایډن سره وکتل او بیا یې د اسټراليا او جاپان د مشرانو په ګډون جوړه شوې غونډه کې ګډون وکړ.
د راپورونو له مخې، مودي په افغانستان کې د طالبانو تر واکمنۍ وروسته په افغانستان کې د افراطي عناصرو د پياوړتيا په اړه اندیښنه وښوده.
د هند د بهرنیو چارو وزیر هارش ورډن شرینګلا وايي: دا احساس ښکاره و چې په نور دقت او مراقبت په افغانستان کې د پاکستان نقش وڅارو، همداراز د ترهرګرو د مسالې په اړه د پاکستان رول ته ځیر اوسو.
هندوستان پر طالبانو د پاکستان پراخ نفوذ او تسلط ته په کتو انديښمن دی، چې د افغانستان له خاورې به ورته ګواښونه پيدا شي.
مخکې د طالبانو یوه ویاند ویلي و، چې دوی په هندي کشمیر کې د مسلمانانو د مبارزې ملاتړ کوي.