تاند -(جمعه، د ميزان دويمه): په کابل کې نن سلګونو ځوانانو او خلکو د يوه لاريون په ترسره کولو سره له امریکا متحده ایالاتو وغوښتل، چې د افغانستان څه باندې نهه میلیارده ډالره کنګل کړې مالي زېرمه د طالبانو اسلامي امارت ته په واک کې ورکړي.
دغه لاریون د جميعت اصلاح سازمان د ځوانانو څانګې (نجم) بللی و، چې يو شمېر ديني عالمانو او صرافانو هم پکې ګډون کړی و.
لاريونوالو د امريکا متحده ايالاتو حکومت وغانده، چې د دوی په خبره په ناقانونه او ظالمانه ډول يې د افغانستان پیسې کنګل کړي او د خلکو ژوند يې له بحران سره مخ کړی.
د نجم مشر ټینګار وکړ، چې د داسې فشارونو په واردولو به امريکا په افغانستان کې د ده په ټکیو خپلو شومو موخو ته ونه رسيږي.
معترضینو خبرداری ورکړ، چې د امريکا لخوا به طالبانو ته د کنګل شويو پيسو نه په واک کې ورکول به انساني ناورين رامنځته کړي، چې ملامتي به يې د امريکا پر غاړه وي.
امريکايي چارواکو بيا ويلي، چې یادې پيسې به د طالبانو له خوا د نړیوالو غوښتنو ته د نه غاړې ايښودو تر مودې کنګل وساتي.