تاند (دوشنبه،‌ د سپتمبر۲۰مه) — د پاکستان د پوځ یو متقاعد افسر زید حامد وایي چې پاکستاني طالبان خوارج او د دوزخ سپیان دي.

حامد په ټوېټر په یوه وروستي ټویټ کې د پاکستان د حکومت له خوا پاکستاني طالبانو ته د بخښنې اعلان غندلی او دا کار یې د پاکستان د حکومت کمزورتیا او د پاکستاني ارزښتونو توهین بللی دی.

حامد پاکستاني طالبان ترهګر او خوارج بللي او لیکلي یې دي، «د پاکستان د کمزوري حکومت د یوه کمزوري وړاندیز په مقابل کې، ترهګرو خوارجو دغه حکومت وشرماوه. پرعکس یې، یادې ډلې د پاکستان د نظریې او شهادتونو ملکیت هم په خپل لاس کې واخیست.»

دغه متقاعد پوځي افسر پاکستاني طالبان د دوزخ سپي بللي او لیکلي دي، «د جهنم سپیانو کې اوس دومره همت پیدا شو چې پاکستان او د هغه روحاني نظریات اغوا کړي.»

سید زمان حامد په خپل ټوېټر او فیسبوک پاڼو په افغانستان کې د طالبانو د اسلامي تحریک په بریا د خوښۍ پوسټونه کوي، او له طالبانو څخه غواړي چې د ښځو لاریونونو ته اجازه ورنه کړي، ځکه دا د هغوی په مقابل کې د امریکا د استخباراتي ادارې توطیه ده او که دوی اجازه ورکړي دا بهیر به لا نور پراخ شي.

ویل کیږي چې نړۍ وال ائتلاف او په ځانګړې توګه امریکایي ځواکونو له ۲۰۰۱ څخه د پاکستان په خاوره کې له خپلو بېسونو څخه په افغانستان کې بمبارۍ وکړې او د طالبانو پر ضد د عملیاتو لپاره یې پاکستان ته له دېرش زرو میلیونو ډالرو څخه ډېرې پیسې ورکړې، لاکن حامد په خپلو بېلابېلو پوسټونو کې د افغانستان پخواني چارواکي د سي آی ای د سپیانو په نومونو یاد کړي دي.

دغه پخواني پاکستاني پوځي افسر په افغانستان کې د طالبانو په واک ته رسېدلو د خلکو له خوا د شکر سجده ستایلې او لیکلي یې دي چې په دې سجدې سره عرش ولړزېد لاکن په پاکستان کې د طالبانو په لاس د شریعت راوستلو هڅې یې د امریکا د استخباراتي ادارې (سي آی ای) او هندوستان د استخباراتي ادارې (را) کارونه بللي دي.

ویل کیږي چې پاکستان په تېرو شلو کالونو کې دوه مخې لوبه وکړه؛ له یوې خوا یې د افغان طالبانو ملاتړ کاوه او بلې خواته یې نړۍ وال ائتلاف ته اډې ورکړې وې، تر دې چې د وخت لومړي وزیر یوسف رضا ګېلاني له نړۍ وال ائتلاف څخه وغوښتل چې له لیرې ځای نه دې د افغانستان جنګ ته مرمۍ نه راوړي، پاکستان حاضر دی چې په لږ قېمت یې پرې خرڅې کړي.‌