تاند( دوشنبه، د سنبلې ۲۹مه) د طالبانو د اسلامي امارت ځینو سرچینو ویلي، چې په هرات کې د دوی ځواکونو یو مشهور سیمه ییز زورواکی حبیب الله غوریانی نیولی.
غوریانی په هرات کې په باج اخیستو او زورواکۍ مشهور و او څو میاشتې مخکې یې د نیول کیدو لپاره د مخکیني پرځول شوي حکومت څو ورځیني عملیات ناکام شوي وو.
د هرات یو شمېر اوسیدونکو د حبیب الله غوریاني د نیول کیدو هرکلی کړی او د طالبانو دا کار یې ستایلی.
د طالبانو رسمي سرچینو او دغه راز خپله غوریاني په دې اړه رسنیو ته څه نه دي ویلي.
پرون طالبانو په کابل کې هم د یو شمېر مشهورو غلو او لوټمارو د نیول کیدو خبر ورکړی و.
له دې سره راپورونه څرګندوي، چې د کابل په ګډون یو شمېر ولایتونو کې جنایي پېښې له څه موده وقفې وروسته بیا د اندیښنې وړ ګرځیدلي.