تاند (یکشنبه، د سنبلې ۱۴) راپورونه وايي چې د ملي مقاومت جبهې ویاند فیهم دشتي نن د پنجشېر په جګړه کې وژل شوی دی.
فهیم دشتي په ۲۰۰۱ م کال د تخار په خواجه بهالدین کې پر احمدشاه مسعود د تروریستي برید په مهال په هماغه خونه کې و چې دوو عربانو له احمدشاه مسعود سره مرکه کوله.
دشتي هماغه وخت سخت ټپي شو خو ورځ یې نه وه پوره. له هغې پېښې ۲۰ کاله وروسته د احمد شاه مسعود د وژل کېدو د شلم تلین په درشل کې نن ووژل شو.
فهیم دشتي په تېرو دوو لسیزو کې د خبریالانو د خوندیتوب لپاره کار کاوه خو د طالبانو له لوري د کابل له نیول کېدو وروسته د احمد مسعود په مشرۍ د ملي مقاومت جبهې له جوړېدو وروسته د دې جبهې د ویندوی په توګه څرګند شو.
ده پرون ویلي و چې د پنجشېر پریان ولسوالي د ملي مقاومت جبهې ځواکونو نیولې او د دې جبهې ځواکونو شاوخوا ۱۰۰۰ تنه طالبان یا وژلي یا ژوندي نیولي دي.
تراوسه د فهیم دشتي د وژل کېدو د څرنګوالي په اړه معلومات نه شته او نه هم په دې اړه څه ویل شوي چې نوموړي چیري ووژل شول.
د ارواښاد دشتي په مړینه به د ژورنالیستانو کورنۍ خامخا خوابدې وي. تاند د ښاغلي دشتي اروا ښاده غواړي او له کورنۍ سره یې خواخوږي څرګندوي.
د فهیم دشتي مړینه تراوسه پورې د ملي مقاومت جبهې تایید یا رد کړې نه ده.