تاند- سپینه ماڼۍ وايي، امریکا دا ظرفیت لري چې پاتې امریکایان تر ټاکلي مهلت پورې له افغانستانه وباسي.
د اسوشیتیدپریس خبري اژانس د راپور له مخې، د سپینې ماڼۍ یوه جګپوړي مامور وویل، شاوخوا ۳۰۰ امریکايي اتباع لا په افغانستان کې پاتې دي او هغوی غواړي چې د ولسمشر بایډن له لوري تر ټاکلي ضرب الاجل یعني د سې شنبې تر ورځې مخکې له افغانستانه ووځي.
نن د دې ترڅنګ چې د کابل پر هوايي ډګر توغندي وویشتل شول، د امریکا بې پېلوټه الوتکې د داعش پر مشکوکو غړیو برید وکړ.
د ځینو راپورونو له مخې، په دې برید کې د یوې کورنۍ ۱۰ غړي وژل شوي دي. د سیمې اوسېدونکي وايي چې وژل شوي کسان ملکي وګړي دي.
د متحدو ایالتونو د بهرنیو چارو وزیر انتوني بلینکن وايي«وروستۍ څو ورځې د دې خورا خطرناک ماموریت تر ټولو خطرناکې شېبې دي.»
اسوشیتیدپریس خبري اژانس وايي، نن / دوشنبه پر هوايي ډګر له راکټي برید وروسته هم د امریکا د پوځ جنګي الوتکې په دغه هوايي ډګر کې بیا بیا پورته کېږي او کښېني.
په هوايي ډګر کې د امریکا د مرکزي قوماندانۍ ویندوی بیل اربن وویل، د حامد کرزي هوايي ډګر لور ته ۵ راکټونه ویشتل شوي وو خو د هوايي مدافع سیستم په وسیله په هوا کې ویجاړ شول.
د روسيې تاس خبري اژانس وايي چې داعش پر حامد کرزي هوايي ډګر د راکټي بریدونو مسوولیت منلی دی.
په همدې حال کې ټاکل شوې ده چې طالبان سبا / سې شنبه د هوايي ډګر بشپړ کنټرول په لاس کې واخلي.
د الجزیرې تلویزیون د راپور له مخې، طالبان له قطر او ترکیې سره په مشورو بوخت دي چې د دغه هوايي ډګر په بیا فعالولو کې ورسره مرسته وکړي.