تاند(دوشنبه، د سنبلې ۸) روسیې نن د امریکا له متحدو ایالتونو وغوښتل چې د افغانستان اسعاري زېرمه او د پیسو پشتوانه ازاده کړي.
د امریکا متحدو ایالتونو وروسته له دې چې دوې اوونۍ پخوا کابل ونیوه، د افغانستان اسعاري زېرمه بلاک یا کنګل کړه.
د افغانستان لپاره د روسیې د ولسمشر ځانګړي استازي ضمیر کابلوف وویل«که لوېدیځ همکاران مو له زړه د افغانانو د برخلیک په اړه اندېښنه لري، دوی باید د افغانستان د اسعاري زېرمو په کنګل کولو د دوی لپاره نورې ستونزې جوړې نه کړي.»
کابلوف د روسیې دولتي تلویزیون رشیا ۲۴ ته همداراز وویل، د امریکا متحد ایالتونه باید د افغانستان شتمني له کنګل حالته راوباسي چې د افغانۍ د ارزښت د لوېدو مخه ونیول شي.
وروسته له دې چې طالبانو کابل نیولی، د ډالرو او نورو اسعارو په وړاندې د افغانۍ ارزښت په شدت کم شوی دی.
کابلوف زیاته کړه، که امریکا دا کار ونه کړي افغان چارواکي به غیرقانوني لارو ته مخه کړي او د افغانستان له ملي اردو او امریکا څخه پاتې شوې وسلې به په تور بازار کې وپلوري.
د پیسو د نړیوال صندوق یا آی ایم ایف پر اساس، د اپریل تر پایه د افغانستان بانک زېرمه ۹ ملیارده او ۴ سوه ملیون ډالرو ته رسېده چې ډېره لویه برخه یې له افغانستانه دباندې ساتل کېږي.
تر څو چې امریکا او نړیواله ټولنه د افغانستان نوی حکومت په رسمیت ونه پېژني ګومان نه کېږي چې د افغانستان اسعاري زېرمه دې له کنګل حالته راوایستل شي.