تاند(دوشنبه، د سنبلې ۸) د امریکا د سنا جرګې مخکښ غړی سناتور لیندسي ګراهم پر ولسمشر جو بایډن له افغانستان څخه د ځواکونو د ایستلو په خاطر انتقاد وکړ، ویې ویل، د ۲۰۰۱ د سپټمبر د یوولسمې په شان د بلې حملې لاره هواره شوه.
ګراهام پرون /یکشنبه د سي بي ایس تلویزیون (فېس دي نېشن) خپرونې ته وویل «زرګونه افغان متحدان، چې زموږ سره اوږه په اوږه یې په زړه ورتیا جګړه وکړه، په میدان پرېږدو.»
په سنا جرګه کې د جنوبي کارولینا دغه جمهوریپال غړي، زیاته کړه، «که زه د بایډن پر ځای وای، لومړی خو به مې ځواکونه نه وو ایستلي، ځواکونه به مې ساتلي وو او له ځايي ځواکونو سره به مې کار کړی و.»
Sen. Lindsey Graham (R-SC) criticizes Biden handling of Afghanistan: “Pres. Biden said he wanted to take this, Afghanistan, off the plate for future presidents. He has done the exact opposite. For the next 20 years, American presidents will be dealing with this catastrophe.” pic.twitter.com/iQKVzDGxsZ
— Face The Nation (@FaceTheNation) August 29, 2021
ده د بې پېلوټه الوتکو په وسیله د داعش د غړیو پر ځپلو شک څرګند کړ، ویې ویل«دا بې پېلوټه الوتکې د اسلامي دولت ډله نه شي له منځه وړلی. د داعش د غړیو شمېر دوه برابره شوی. موږ خپلو متحدانو ته شا واړوله… او د سپټمبر یوې بلې یوولسمې ته مو شرایط برابر کړل. زه لکه څومره چې اوس اندېښنه لرم چې پر هیواد به مو حمله وشي، بل هیڅوخت مې دومره اندېښنه نه لرله.»
له بلې خوا د امریکا د ملي امنیت پخواني سلاکار مک ماسټر ویلي چې امریکا د افغانستان د منتخب حکومت پر ضد له طالبانو سره لاس یو کړ او هغه یې نسکور کړ.