تاند(دوشنبه، د سنبلې ۸) راپورونه وايي چې د ناټو غړې ترکیه د طالبانو د رژیم په رسمیت پېژندلو ته نژدې شوې او په مقابل کې یې دا هیواد له قطر سره په ګډه د کابل د هوايي ډګر په فعالولو کې برخه اخلي.
د ترکیې او قطر له لوري په ګډه د کابل د نړیوال هوايي ډګر په فعالولو کې برخه به له طالبانو سره مرسته وکړي چې نړیوال د دې ډلې له حکومت سره تعامل وکړي.
د ترکیې او طالبانو ترمنځ موافقه د ترکیې د ولسمشر رجب طیب اردوغان تایید ته ځنډول شوې ده خو تمه ده چې له افغانستانه د سې شنبې په ورځ د امریکايي پوځیانو له وتلوړ وروسته به نهايي شي.
د امریکا ولسمشر جو بایډن لا هم په دې کلک ولاړ دی چې د اګست تر ۳۱ پورې خپل ټول ځواکونه د کابل له هوايي ډګره وباسي.
د امریکا او طالبانو ترمنځ په خبرو کې یوه جنجالي موضوع د کابل د هوايي ډګر د امنیت وه.
خو اوس داسې ښکاري چې طالبانو له ترکیې سره منلې چې د کابل د هوايي ډګر امنیت د خصوصي قراردادیانو په وسیله وساتي، او ترک پوځیان او پولیس هلته ځای پر ځای شي.
د دې په مقابل کې به ترکیه د طالبانو حکومت د افغانستان د مشروع او قانوني دولت په توګه په رسمیت وپېژني.
تراوسه پورې هیڅ هیواد د طالبانو حکومت په رسمیت نه دی پېژندلی او هیڅ هیواد نه دي ویلي چې د طالبانو له لوري جوړېدونکی حکومت به په رسمیت وپېژني.