تاند(چهارشنبه، اسد٢٧) – د روغتیا نړیوال سازمان مشر ډاکتر ټډروس اډهانوم ګيبرياسس د افغانستان د عامې روغتیا وزارت سرپرست سره د خبرو پرمهال ډاډ ورکړ چې په افغانستان کې د روغتیا په برخه کې خپلو همکاریو ته دوام ورکوي.
هغه په خپل فېسبوک پاڼه لیکلي، چې د عامې روغتیا وزارت سرپرست ډاکتر وحید مجروح سره يې خبرې کړې او د ده فعالیتونه يې ستايلي دي.
نوموړى وايي، د روغتیا په برخه کې له افغانستان سره خپلو مرستو ته ژمن دي.
په همدې حال کې د افغانستان د عامې روغتیا وزارت سرپرست ډاکتر وحید مجروح ښاغلي ګيبرياسس ته ډاډ ورکړ چې په ټول افغانستان کې خپلو فعالیتونو ته دوام ورکوي او د نوي نظام په راتګ سره يې خپلې هڅې لا ګړندۍ کړي دي.
مجروح دغه راز په خپل فېسبوک پاڼه لیکلي: “زه له دې خاورې او په دې خاوره کې د وطن خاورې خدمت کوم. نه مې پاسپورټ ترلاسه کړ، نه مې د ویزې لپاره منډې وکړې او نه هم پټ يم. نن په هېڅ ډول مې نشو کولی چې خپل همکاران د نا امیدۍ او وېرې حالت کې یوازې پرېږدم. نن یوځل بیا د روغتیا وزارت او د هېواد په روغتیایي نظام زموږ د همکارانو په شتون کې بیاځلې ساه واخیسته.”
ښاغلي مجروح د مخکیني ولسمشر محمد اشرف غني له لوري د عامې روغتیا وزارت د سرپرست په توګه وټاکل شو او د طالبانو په راتګ سره تر اوسه خپله دنده پرمخ وړي.