تاند(چهار شنبه، د اسد ۲۷) امریکا او روسیې اعلان وکړ چې لا ډېر وختي دی چې د طالبانو حکومت په رسمیت وپېژني.
د امریکا د متحدو ایالتونو د ملي امنیت سلاکار جېک سیلفان وویل چې امریکا د طالبانو حکومت اوس د افغانستان د مشروع حکومت په توګه په رسمیت نه پېژني او په دې اړه پرېکړه به تر وخت مخکې وي.
ده دا خبره پرون / سې شنبه وروسته له دې په سپینه مانۍ کې په یوه خبري غونډه کې وکړه چې طالبانو د یکشنبې په ورځ کابل ونیوه.
ده وویل«اوس په کابل کې ګډوډ حالت دی، هلته حکومت او اداره نه شته، نو دا به تر وخت مخکې وي چې د حکومت د رسمیت پېژندلو په اړه څه وویل شي.»
له بلې خوا د روسیې د بهرنیو چارو وزیر سرګی لاوروف پرون / سې شنبه وویل، روسیه د طالبانو د رژیم په رسمیت پېژندلو کې له بیړې کار نه اخلي.
د تاس خبري اژانس د راپور له مخې، لاوروف وویل چې ده له خپل چینايي ساري سره پرون /دوشنبه/ خبرې وکړې او خپل دریځونه یې سره شریک کړل.
بریتانیا هم ویلي چې د طالبانو حکومت به رسمیت ونه پېژني. د دغه هیواد صدراعظم بوریس جانسن پرون د پاکستان له صدراعظم عمران خان څخه هم ورته غوښتنه وکړه.
د پاکستان د بهرنیو چارو وزیر شاه محمود قریشي مخکې ویلي و چې نړیوالو ته به وګوري چې د افغانستان د حکومت د رسمیت پېژندلو په اړه څه پرېکړه کوي او دغه راز به د پاکستان ملي ګټې په نظر کې ونیسي.