تاند(پنجشنبه، د اسد۲۱) وسله وال طالبان وايي چې د غزني ولایت مرکز، غزني ښار یې نیولی دی.
د ولایتي شورا ځینې غړي او شاهدان تاییدوي چې طالبان په ښار کې دي او اکثره دولتي ودانۍ یې نیولي دي.
د طالبانو یوه ویندوی ذبیح الله مجاهد ویلي چې نن د دوی کسانو د غزني ښار، د وایت مقام، امنیه قومانداني، محبس او پوځي مرکزونه ونیول.
د غزني له څو هزاره مېشتو ولسوالیو پرته د دغه ولایت ټولې ولسوالۍ له ډېرې مودې راهیسې د طالبانو په کنټرول کې وې.
غزني ښار تر دې وړاندې هم د لنډ وخت لپاره طالبانو نیولی و. غزني لسم ولایتي مرکز دی چې د طالبانو لاس ته لوېږي.
همداراز له فراه څخه راپور وايي چې په دغه ولایت کې د ملي اردو لوا بې جګړې طالبانو سپارل ده.
ویل شوي چې د لوا قوماندان، د ولایتي شورا رييس او یو شمېر پوځیان ایران ته تللی او وروسته طالبان لوا ته داخل شوي دي. په دې اړه دولتي چارواکو او طالبانو لا څه نه دي ویلي.