تاند(چهارشنبه، اسد٢٠) – په افغانستان کې د روانو جګړو له امله جرمني او هالنډ د لنډې مودې لپاره افغانستان ته د افغان پناه غوښتونکو د بېرته ستنولو بهیر ودروه.
د جرمني د کورنیو چارو وزارت وايي، دغه پرېکړه يې د افغانستان د بې ثباته امنیتي وضعیت له امله کړې ده.
دغه راز هالنډ هم افغانستان ته د افغان پناه غوښتونکو د بېرته ستنولو بهير د شپږو میاشتو لپاره هم وځنډاوه.
د جرمني د کورنیو چارو وزارت په باور، په چټکۍ سره د طالبانو له لوري د سيمو نيول د پناه غوښتونکو د بېرته ستنولو بهیر ناشونى کړى دى.
له افغانستانه د امریکايي او ناټو ځواکونو په وتو سره له تېرې مې مياشتې راهيسې وسله والو طالبانو د سىيمو د نيولو په موخه بريدونه پيل کړي چې ملکي وګړو ته په کې درنه مرګ ژوبله اوښتې ده.
دغه راز په افغانستان کې د جګړې په تودېدو سره په کور دننه او بهر د افغانانو د کډوالۍ بهير پيل شوى چې په خورا بد وضعیت کې شپې او ورځې سبا کوي.