تاند(شنبه، اسد١٦) – له تېرې يوې اونۍ راهیسې د څلورم ځل لپاره د کندهار هوايي ډګر تر راکټي بريدونه لاندې راغى او پروازونه يې وځنډېدل.
د کندهار د هوايي ډګر مسئول مسعود پښتون وايي، پر هوايي ډګر دوه توغندي توغول شوي او چاته په کې زيان نه دى اوښتى خو په وینا يې د کام اير هوايي شرکت يوه الوتکه چې له کابل څخه ورغلې وه چې له ناستې پرته بېرته کابل ته ستنه شوه.
تر اوسه کومې ډلې د نن ورځې د برید پړه نه ده منلې خو څو ورځې مخکې پر دې ډګر د راکټي بريدونو پړه وسله والو طالبانو منلې وه.
ياده دې وي، چې تېره اونۍ د يکشنبې په ورځ د کندهار د هوايي ډګر پر ځغاستليکه د راکټي برید له امله دغه ليکه تخریب شوې وه او دغه راز د يوې ورځې لپاره پروازونه هم ځنډېدلي وو.