تاند (پنج شنبه، د اسد ۱۴) افغان ولسمشرمحمد اشرف غني نن د ايران د نوي ټاکل شوي ولسمشر ابراهيم رئيسي په رسمي بلنه دغه هېواد ته لاړ او د نوموړي د لوړې په مراسمو کې به هم برخه واخلي.
ارګ په یوه خبرپاڼه کې ویلي، چې غني به په دغه سفر کې له خپل ايراني سيال ابراهيم رئيسي سره د ليدنې ترڅنګ د دغه هېواد د پارلمان له مشر او نورو چارواکو سره ليدنې وکړي.
خبرپاڼه کاږي، چې ولسمشر غني به په دې سفر کې له براهیم رئیسي سره د دواړو هېوادونو ترمنځ د اړیکو لا زیاتې پراختیا او همکاریو په اړه هم خبرې وکړي
په دې سفر کې له ولسمشر سره سرور دانش، د بهرنیو چارو وزیر محمدحنیف اتمر او د جمهوري ریاست عالي مقام دفتر عمومي رئیس عبدالمتین بېک هم ملتیا کوي.
نوموړی داسې مهال ایران ته سفر کوي، چې په افغانستان کې د جګړې لمن ورځ تر بلې پراخېږي.
بل پلور ولسمشر غني یو ځل بیا د طالبانو جګړه فتنه بللې او ټینګار یې کړی، چې د دغې ډلې له لوري روانه جګړه ناروا او د دین او عنعناتو خلاف ده.
نوموړي چې پرون یې د افغان امنیتي ځواکونو په ملاتړ د ولایتي شوراګانو له لوري جوړې شوې غونډې ته خبرې کولې وویل، د طالبانو یوازینۍ دنده د خلکو وژل او د وطن بربادي ده.
هغه زیاته کړې چې هیچاته به د دې اجازه ورنه کړي چې د افغانستان تېرې شل کلنې لاسته راوړنې له منځه یوسي.
نوموړي دغه راز ټینګار وکړ چې طالبان د پاشل کېدو په حال کې دي او ډېر ژر به په ډلو ټپلو ووېشل شي.
هغه دغه راز زیاته کړې، چې سیمه ییز هېوادونه باید پوه شي چې ګټه یې د افغانستان په ثبات کې ده او باید په دې برخه کې له افغانستان سره په همغږۍ د پام وړ همکاري وکړي.