تاند (دوشنبه د اسد ۱۱) امریکایي الوتکو یو ځل بیا د هلمند په لښکرګاه کې پر طالبانو هوایي برید کړی دی.
د افغانستان د ملي دفاع وزارت د دغو حملو د پخلي ترڅنګ ويلي چې په دې برید کې اووه طالب وسله وال وژل شوي دي.
د ملي دفاع وزارت مرستیال ویاند فواد امان پر خپل ټویټر په یوه ټویټ کې لیکلي چې د دې برید په نتیجه کې د طالبانو زیاته اندازه وسلې او مهمات هم له منځه تللي دي.
#US Air Forces targeted #Taliban terrorist in #Lashkargah city today morning. 7 terrorists were killed and a large amount of their weapons and ammunition were destroyed as a result of the #airstrike.
— Fawad Aman (@FawadAman2) August 2, 2021
ورته مهال امنیتي چارواکي وايي چې د هلمند ولایت پر زندان يې د وسله والو طالبانو لوی برید پر شا تمبولی او له زندان څخه يې ساتنه کړې ده.
په لښکرګاه ښار کې د ننه د هلمند پر عمومي زندان تېره ورځ ناوخته وسله والو طالبانو ډله ییز برید وکړ چې د چارواکو په وینا زندان افغان ځواکونو ساتلی.
په هلمند کې د ۲۱۵ میوند قول اردو ویاند وايي، طالبانو تېره ورځ ناوخته پر لښکرګاه ښار او عمومي زندان برید وکړ چې یاد برید د امنیتي ځواکونو له توند غبرګون سره مخامخ شو او په وینا یې د دې برید په ترڅ کې طالبانو ته درنه مرګ ژوبله واوښته.
ډګرمن عبدالقدیر بهادرزي نن دوشنبه وویل چې پر طالبانو هوایي بریدونه هم شوي چې په پایله کې یې تر ۳۸ پورې وسله وال وژل شوي، خو دا نه یې ونه ویل چې دغه بریدونه افغان هوایي ځواک او که امریکایانو کړي دي.
طالبانو تر اوسه په دې هکله څه نه دي ویلي.