تاند(يکشنبه، اسد١٠) – د احمدشاه بابا د هوايي ډګر مسئولين وايي، د دې ډګر په ځغاستليکې تېره شپه څو راکټونه لګېدلي دي.
لومړني راپورونه وايي، چې د راکټو د لګېدو له کبله مرګ ژوبله نه ده پېښه شوې.
د احمدشاه بابا هوايي ډګر ريیس مسعود پښتون فرانس پریس خبري اژانس ته ویلي، چې دوه راکټونه د هوايي ډګر پر ځغاستلیکې لګېدلي او له کبله یې ټولې الوتنې لغوه شوې دي.
ده په عین حال کې ویلي چې د ځغاستلیکې د بېرته جوړولو کار پیل شوی او تمه لري چې نن ورځ به بشپړ شي.
کندهار په وروستیو ورځو کې د خونړیو نښتو په میدان بدل شوی چې له کبله یې زرګونه کورنۍ بې ځایه کېدو ته مجبوره شوې دي.
طالبانو ویلي چې د کندهار پر هوايي ډګر حمله دوی کړې ده.
د طالبانو ویندوی ذبیح الله مجاهد ویلي، چې پر هوايي ډګر یې د دې لپاره برید کړی چې له هغه څخه د هوايي حملو لپاره کار اخیستل کېږي.