تاند ( شنبه د اسد ۹ مه) د نورستان ولایت کامدیش ولسوالۍ ته د مرستندویانو له ورتګ سره د طالبانو مخالفت سیلاب ځپلو ته د مرستو د رسولو او د جسدونو د لټون چارې ټکنۍ کړې دي.
په ولسي جرګه کې د نورستان د خلکو استازی اسمعیل اتیکان وایي چې طالبان سیمې ته د دولتي ځواکونو او مرستندویو بنسټونو د ډلو له ورتګ سره مخالفت کوي. دده په وینا لاهم د لسګونه لادرکو کسانو برخلیک څرګند نه دی او د مړو د را اېستلو کار هم خورا پښه نیولی روان دی.
طبیعي پېښو ته د رسېده ګۍ په چارو کې د دولت وزارت د شمېرو له مخې په دې پېښه کې تر دې مهاله ۱۱۳ تنو مړینه او د شاوخوا ۷۰ نورو ټپي کېدل تایید شوي دي.، خو دغه وزارت اندېښنه دا ده چې لسګونه کسان لاهم لادرکه دي چې په دې سره به د پېښې د قربانیانو شمېر نور هم زیات شي.
د نورستان په کامدیش ولسوالۍ کې د چهارشنبې په شپه سیلابونه راغلل او دغه ناورین یې رامنځته کړ.
په دې پېښه کې شاوخوا ۱۷۰ کورونه وران شوي دي.
بل خوا د طالبانو ویاند رسنیو ته ویلي دي چې دولتي ځواکونو او هغو مرستندویانو ته به سیلاب ځپلې سیمې ته د ورتګ اجازه ورنه کړي چې وسله ورسره وي.
ځايي چارواکي وایي چې که سیمې ته ژر مرستندویې ډلې ونه رسېږي، ددې پېښې تلفات به نور هم زیات شي.