تاند(یکشنبه، د اسد ۳) په داسې حال کې چې افغان امنیتي ځواکونه د مهمو ستراتیژیکو بندرونو د بېرته نیولو لپاره پلان جوړوي، د امریکا دفاع وزیر لویډ اسټن وايي، افغان امنیتي ځواکونو ته پکار ده چې د بایللو سیمو تر بېرته نیولو وړاندې د طالبانو د پرمختګونو مخه ونیسي.
اسټن پرون / شنبه الاسکا ایالت ته د سفر په ترڅ کې خبریالانو ته وویل، افغان امنیتي او دفاعي ځواکونه د ګڼ نفوسو سیمو او ښارونو په شاوخوا کې خپلې مورچې پیاوړې کړي.
ده زیاته کړه، «په دې اړه چې افغان امنیتي ځواکونه به د طالبانو مخه ونیولی شي او که نه، زه فکر کوم لومړنی کار چې پکار ده ویې کړي دا دی چې د طالبانو د پرمختګ سرعت ودروي.»
ده ټینګار وکړ چې افغان ځواکونه د پرمختګ کولو ظرفیت او وړتیا لري خو باید وکتل شي چې څه پېښېږي.