تاند(شنبه، د اسد ۲) له افغانستانه د امریکايي ځواکونو د وتلو د بهیر د بشپړېدو په درشل کې د امريکا ولسمشر جوبايډن او ولسمشر محمد اشرف غني د جمعې په ماخوستن ټيلفوني خبرې وکړې.
ولسمشر غني وايي له جوبايډن سره د دواړو هېوادونو د بدلېدونکو خو دوامداره اړيکو په هکله غږېدلی دی.
ولسمشر غني همداراز ویلي چې د امريکا ولسمشر جوبايډن ډاډ ورکړی چې له افغان ځواکونو به دامریکا ملاتړ دوام ولري، ولسمشر غني پر خپل ټويټر پاڼه ليکلي چې پهدغو خبرو کې دواړو لورو د سولې او ټيکاو لپاره د افغانانو د اجماع پر اهميت ټينګار کړی دی.
په دغو خبرو کې ويل شوي چې افغان ځواکونه د هېواد د ساتنې او دفاع وړتيا لري.
جوبايډن لهولسمشر غني سره په خبرو کې يو ځل بيا له افغان حکومت سره د واشګټن د ډیپلوماټيکو او اقتصادي همکاريو د ملاتړ خبره کړې او د امنيتي ځواکونو او د تېرو شلو کلونو د لاسته راوړنو ساتل يې مهم بللي دی.
د امریکا ولسمشر په داسې حال کې د افغان ځواکونو د ملاتړ ژمنه تازه کړې چې همدا درې ورځې وړاندې د امريکايي ځواکونو الوتکو د افغان ځواکونو په ننګه په کندهار کې پر طالبانو بمباري وکړه.
طالبانو د امريکا دا کار د دوحې د ژمنې خلاف بللی دی.
تر دې وړاندې پنټاګون ويلي و چې د ځانګړو افغان ځواکونو روزنې ته به په يوه بل هېواد کې دوام ورکړي.
له بلې خوا ټاکل شوې ده چې په راتلونکو څو ورځو کې د امریکا د بهرنیو چارو وزیر انتوني بلینکن کابل ته راشي. د افغانستان او امریکا د مشرانو ترمنځ وروستۍ اړیکې وروسته له دې ډېرېږوي چې طالبانو یو شمېر ولسوالۍ ونیولې او د سولې په اړه یې شرطونه سخت کړل.
دې ډلې ویلي چې په هغه صورت کې د افغانستان د مسلې د سوله ییز حل ننګه کوي چې مقابل لوری یې بې جګړې ورسره یوځای شي.