تاند (یکشنبه د سرطان ۲۷) د افغانستان د ملي دفاع وزارت وایي، امنیتي ځواکونو د پروان ولایت سرخ پارسا او د غزني ولایت مالستان ولسوالۍ له وسله والو طالبانو لېرته نیولي دي.
دغه وزارت د یوې خبرپاڼې په خپرولو سره ویلي چې یادې ولسوالۍ د افغان امنیتي ځواکونو او ولسي پاڅون کوونکو د ګډو عملیاتو په پایله کې نن له وسله والو طالبانو څخه پاکې شوې.
خبرپاڼه زیاتوي، «مالستان او سرخ پارسا ولسوالۍ د ترهګرو له شتونه پاکه شوې او کنټرول يې د دفاعي او امنیتي ځواکونو په ولکه کې دی، د دغو ولسوالیو په شاوخوا سیمو کې د ترهګرو طالبانو د پاکېدو په موخه چاڼیز عملیات په چټکي سره دوام لري…»
د پروان والي فضل الدین عیار هم نن یکشنبه له طالبانو د سرخ پارسا ولسوالۍ د بېرته نیول کېدو په هکله رسنیو ته وویل، «نن ورځ سرخ پارسا ولسوالۍ د نه ستړي کېدونکو هلو ځلو او مبارزې په پایلو کې ازاده شول،یو نېک ګام دی،دښمن شړل شوی دی.»
وسله والو طالبانو تر اوسه په دې هکله تبصره نه ده کړې.
د ملي دفاع وزارت تېره ورځ له وسله والو طالبانو څخه د پروان ولایت د شیخ علي ولسوالۍ د بېرته نیول کېدو خبر هم ورکړ.