تاند ( یکشنبه، د سرطان ۲۷) ختیځ کې د ۲۰۱ سېلاب قول اردو مسوولان وایي، چې تېره شپه افغان ځواکونو د ننګرهار د هسکې مېنې ولسوالۍ په غرښلي او آنتن تپې سیمو کې د طالبانو د ځپلو په موخه عملیات ترسره کړل.
د یادې قول اردو ویاند سیدمقصود صاحبزاده وایي، په دې عملیاتو کې د ۳ پاکستانيانو په ګډون ۲۷ تنه وسله وال طالبان و وژل شول او ۱۵ تنه نور يې ټپيان شول.
صاحبزاده وایي، په دې عملیاتو کې دغه راز افغان ځواکونو د طالبانو یو اندازه درنې او سپکې وسلې هم نیولي دي.
نوموړی زیاتوي، د يو شمېر وژل شویو طالبانو جسدونه د جګړي په سیمه کې پاتې دي.
د صاحبزاده په خبره په دې عملیاتو کې ولسي خلکو ته زیان نه دی اوښتی.
بل لورته وسله والو طالبانو بیا تر اوسه په دې اړه څه نه دي ویلي.