تاند ( شنبه، د سرطان ۲۶) ختیځ کې د ملي اردو چارواکي وایي، چې د ننګرهار په اچین او شېرزادو ولسوالیو کې افغان ځواکونو د عملیاتو پرمهال ۴۴ وسله والو طالبانو ته مرګ ژوبله اړولې ده.
ختیځ کې د ۲۰۱ سېلاب قول اردو ویاند سید مقصود صاحبزاده تاند وېب پاڼې ته وویل، چې دا عملیات تېره ورځ ناوخته د شېرزادو ولسوالۍ په ګندمک سيمه کې او د اچين ولسوالۍ په سنځلي سیمه کې ترسره شول.
صاحبزاده وایي، په دې عملیاتو کې ۱۷ وسله وال طالبان وژل شوي او ۲۷ نور ټپيان دي.
د نوموړي په خبره په دې عملیاتو کې د وسله والو طالبانو په زیاته اندازه درنه او سپکه وسله هم له منځه وړل شوې ده.
بل لورته وسله والو طالبانو تر اوسه په دې تړاو څه نه دي ویلي.