تاند ( شنبه، د سرطان ۱۹) د هند د بهرنیو چارو وزیر جي شنکر تېره ورځ د روسیې د بهرنیو چارو له وزیر سرګي لاوروف سره په لیدنه کې په افغانستان کې د روانو حالاتو په اړه اندېښنه وښوده او د تاوتریخوالي کمېدو غوښتنه یې وکړه.
جي شنکر په افغانستان کې روان حالات خواشینوونکي بللي او زیاته یې کړه ، چې تاوتریخوالی د افغانستان د وضعیت حل لاره نشي کېدای.
په ورته وخت کې د روسیې د بهرنیو چارو وزیر هم افغانستان کې په روانو حالاتو اندېښنه وښوده او د یو داسې سیاسي بهیر په ژر پيلېدو يې ټېنګار وکړ، چې په خبره یې ټول افغانان یې ننګه وکړي.
په همدې حال کې د هند د بهرنیو چارو وزارت ویلي، چې د افغانستان د روانو حالاتو سره سره به دا هېواد په کابل کې خپل سفارت ونه تړي.
جي شنکر وویل، په افغانستان کې مخ په خرابېدونکی امنیتي حالات او په افغانستان کې د هندي وګړو د امنیت او مصونیت مسایل له نږدې څاري.
هند او روسیه داسې مهال دا اندېښنه ښيي، چې بل لورته د افغان سولې لپاره د امريکا ځانګړى استازی زلمی خلیلزاد وايي، داسې فکر کوي چې طالبانو د مذاکراتو پر مېز د برلاسي لپاره جګړه سخته کړې ده.
خلیلزاد زیاته کړې چې افغانستان کې د جګړې سختېدو تمه یې درلوده، خو په پوځي ډګر د طالبانو پرمختګ حیران کړی دی.