تاند(جمعه، د سرطان ۱۸) د امریکا دفاع وزارت یا پینتاګون وايي، افغان امنیتي ځواکونه په افغانستان کې د امنیت د ټینګښت لپاره د ښه هوايي ځواک په ګډون مدرنې وسلې، روزنه او کافي شمېر پرسونل لري.
د پینتاګون ویندوی جان کربي پرون (پنجشنبه) ناوخته همداراز وویل، پر دې سربېره د امریکا متحد ایالتونه به افغانستان ته نورې الوتکې ورکړي او د هغو ساتنې او لوژیستیک ملاتړ ته به دوام وکري.
ښاغلي کربي دا څرګندونې د افغانستان په اړه له خبریالانو سره په یوه خبري غونډه کې وکړې.
تر ده وړاندې د امریکا ولسمشر جو بایډن هم په خپله وینا کې ډاډ څرګند کړ چې د افغانستان حکومت ځان ساتلی شي او طالبان یې نه شي پرزولی.
کربي ویل، دا د افغانستان د حکومت په ارادې پورې تړاو لري چې د ټول هیواد او ملت د سوکالۍ، امنیت او سولې په خاطر د دایمي سیاسي جوړجاړي لپاره خبرې کوي او که یې نه کوي.
ده زیاته کړه«موږ د سیمې له ټولو هیوادونو هغه څه غواړو چې موږ یې د افغانانو لپاره غواړو او هغه سوله، امنیت، ثبات او د افغانانو په مشرۍ او مالکیت د خبرواترو داسې پروسه ده چې د سیاسي جوړجاړي سبب کېږي. دا په افغانانو پورې اړه لري چې خپله راتلونکې په خپله معلومه کړي.»
د امریکا د دفاع وزارت ویندوی ادعا وکړه چې ايتلافي ځواکونه له ۲۰۰۱ څخه راوروسته په دې بریالي شوي چې د امریکا خاورې ته د القاعده او نورو تروریستي ډلو خطر ک کړي.
«همدا د ځواکونو د ایستلو لپاره د ولسمشر د پرېکړې لوی دلیل دی.»
ده په عین حال کې وویل چې امریکا به افغانستان له نژدې څاري چې له دغه هیواده بیا امریکا ته تروریزم سر راپورته نه کړي.