تاند (چهارشنبه د سرطان ۱۶) سیمه ییز سرچینو تایید کړې چې وسله والو طالبانو د بادغیس د ولسوالیو تر نیولو وروسته په مرکز قلعه نو برید کړی او ښار ته ننوتي دي.
د رسنیو د راپورونو له مخې، دا مهال قلعه نو کې د افغان ځواکونو او وسله والو طالبانو تر منځ سخته جګړه روانه ده او طالبانو د ښار یو شمېر برخې نیولي دي.
سیمه ییزو چارواکو بیا ویلي چې د دې ولایت د ملي امنیت د امر خواجه مراد په ګډون له سلو زیات د امنیتي ځواکونو غړي له طالبانو سره یوځای شوي دي.
د بادغیس والي حسام الدین شمس هم تاییدوي، چې طالبان د ولایت مرکز ته ننوتي او ټولې ولسوالۍ لا له وړاندې د طالبانو لاس ته لوېدلې وې.
والي له مرکز څخه د بېړنۍ مرستې غوښتنه کړې، خو تر اوسه معلومه نه ده، چې د مرکز ځواب څه دی.
طالبانو هم ویلي چې د بادغیس مرکز ته ننوتي او څه باندې دوه سوه امنیتي ځواکونه له وسلو او مهماتو سره یو ځای ورته تسلیم شوي دي.