تاند ( جمعه د سرطان ۴) امریکايې چارواکو افغانستان سره د ۳ ملیونه دوزه د کورونا ضد واکسین د مرستې ژمنه کړې.
د سپینې ماڼۍ د ویاند مرستیالې کرین ژاین ویلي، چې دا واکسین به راتلونکې اوونۍ افغان حکومت ته وسپارل شي.
ژاین ویلي، متحده ایالات به د افغانستان سره د اکسیجن مرسته هم وکړي.
د دې مرستې اعلان داسې مهال کېږي، چې په افغانستان کې د کورونا وبا د پېښو تر ډېرېدو وروسته په روغتونونو کې د اکسیجن د کمښت شکایتونه ډېر خپاره شول.
اوسمهال په افغانستان کې د کورونا وبا درېیمه څپه ورځ تر بلې په تېزۍ د خپرېدو په حال کې ده.
د نظر د خاوندانو په بارو په افغانستان کې کمزوری صحي سیستم او د کورونا ناروغانو د لازمو اسانتیاوو نه برابرېدل هغه ستونزه ده چې ورځ تربلې پېښې زیاتېږي.
د یادونې ده، چې څو ورځې وړاندې پاکستان هم له افغان حکومت سره د یوې روغتیايي بستې مرسته وکړه، چې په کې د کورونا ضد توکي شامل وو.