تاند (سه شنبه د سرطان ۱) د اوبو د چارو د تنظیم ملي اداره وايي د بدخشان ولایت د شورابک برېښنا بند کارونه بشپړ شوي او ډېر ژر به افتتاح شي.
د دغې ادارې د ویاند نظام الدین خپلواک د معلوماتو پر اساس دا بند د جرمني د ۴۵ میلیونه یورو په لګښت جوړ شوی دی.
د نوموړي په خبره د دغه بند د جوړېدو چارې په پنځو کلونو کې بشپړې او د درېیوو توربینونو په لرلو سره ۷.۵ مېګاواټه برېښنا تولیدوي چې د فیض اباد ښار ۲۵ زره کورنیو ته برېښنا رسوي.
د یادونې ده چې تر دې وړاندې د کمال خان بند په ګډون یو شمېر نور بندونه هم افتتاح شوي دي.
افغانستان د برېښنا تولیدولو او اوبو زېرمه کولو لپاره د بندونو جوړولو مناسب طبیعي شرایط لري، خو د اوبو د نه مدیریت له امله د دغه هېواد نږدې اویا سلنه اوبه ګاونډیو هېوادونو ته بهېږي.
ولسمشر غني د کمال خان بند د پرانیستې پر مهال وویل، هڅه کوي د افغانستان اوبه مدیریت کړي څو نورو هېوادونو ته په وړیا ډول ونه بهیږي.