تاند ( چهارشنبه، د جوزا ۲۷) د ننګرهار ولایت په مرکز جلال اباد ښار کې د هېواد په کچه د ۱ ملیون او ۱۰۰ زره امريکايي ډالرو په لګښت د کبانو د دانې توليدي کارخونې پر فعاليت پيل وکړ.
دا کارخونه حبيب حسام شرکت جوړه کې،چې په يوه ساعت کې د ۲۰ ټنه دانې د تولید ظرفيت لري.
د دې ولایت د کرنې رئيس انعام الله ساپی وایي، چې هر کال هېواد ته د ۱۲۰ مليونه امريکايي ډالرو په ارزښت شاوخوا ۱۰۰ زره ټنه کبان وارديږي، چې د دا ډول فابريکو په فعاليدو سره به وطني توليدات زيات شي.
په ورته وخت کې د یاد شرکت رئيس عزيز الله حسام وويل، دوی اړتيا ته په کتو د هېواد په کچه دغه کارخونه پرانیسته.
د حسام په خبره دوی به هڅه وکړي، چې ګاونډیو هېوادونو ته هم صادرات ولري.
هغه وايي له دوی سره د چرګوړو، هګيو، د چرګ او کبانو دانې تولید برخه کې شاوخوا ۴۴۰ کسان په کار بوخت دي.
عام خلک هم په دې باور دي، که سوداګر په خپل هېواد کې د ننه پانګونه وکړي نو حتمي ده چې ګڼو ځوانانو ته به د کار زمینه برابره شي.