تاند (سه شنبه د جوزا ۲۵) وروسته له هغې چې نامعلومو وسله والو په ننګرهار کې د پولیو ضد واکسین کمپاین ۵ واکسیناتوران ووژل او څلور نور یې ټپیان کړل، دغه کمپاین ودرول شو.
د ننګرهار ولایت چارواکي وايي چې نامعلومو وسله والو نن له غرمې وړاندې د دې ولایت په خوګیاڼو، سرخرود او جلالاباد ښار کې په پنځه جلا جلا بریدونو کې پنځه واکسیناتوران ووژل او ۴ نور یې ټپیان کړل چې په ټپیانو کې یې د دوو تنو وضعیت د اندېښنې وړ دی.
په ختیځ کې د پولیو د مخنیوي د عملیاتي مرکز مسؤلان وایي، د واکسیناتورانو ژوند ته د شته ګواښونو د مخنیوي په خاطر د درول شوي کمپاین له امله په ټول ننګرهار کې شااوخوا درې نیم لکه ماشومان چې واکسین ورته باید تطبیق شوی وی، له واکسینه پاتې شول.
د دغه مرکز مشر نجیب الله کامه وال وایي، په افغانستان کې یې د پولیو د مخنیوي برخه کې د بهرنیو مرستندویانو او ځایي ولایتي مسؤلانو سره په ګډه د واکسیناتورانو د خوندیتوب په خاطر تر امر ثاني پورې د واکسیناسیون کمپاین د درولو پرېکړه کړې ده.
نوموړی اندېښنه ښيي چې که چېرته د واکسیناتورانو د وژنې لړۍ دوام وکړي او خوندیتوب ته یې پام ونه شي، نو د پولیو ضد واکسین څخه د شااوخوا درې نیم لکه ماشومانو د محرومېدو امکان شته.
هغه زیاتوي چې په ننګرهار کې له پنځه کلنۍ ښکته د شاوخوا ۷ لکه ماشومانو له ډلې تېره ورځ ۳۰ سلنه یې واکسین شوي و او په وینا یې چې ننني ارقام نهایي نه دي، خو د پرون او نن ورځې په جریان کې دې امکان ولري چې ۵۰ سلنه ماشومان واکسین شو وي او پاتې نور یې د اوس له پاره له واکسینو محروم شول.
نجیبالله کامه وال وايي واکسیناتوران بې طرفه ډله ده نو باید ټولې خواوې د دوی پر وړاندې تاوتریخوالی ودروي او پرېږدي چې د افغان ماشومانو د روغتیا لپاره کار وکړي.
د روان میلادي کال د مارچ میاشتې په ۳۰مه کله چې په جلالاباد کې درې تنه ښځينه واکسیناتورانې ووژل شوې، د دوه ورځو لپاره د پولیو ضد واکسین کمپاین درول شوی و چې تر نن د دغې پېښې عاملان نه دي نیول شوي.
په افغانستان کې د امریکا شارژدافیر راس وېلسن د دغو بریدونو د غندنې ترڅنګ د دغو پېښو د عاملانو د محاکمې غوښتنه کړې او وایي، دوی په افغانستان کې د پولیو د مخنیوي په برخه کې پوره همکارۍ ته تیار دي.
خو د ننګرهار ځايي چارواکي وايي چې دوی د واکسین له تطبیقوونکو او د دوی له مسؤلانو سره همغږي کړې وه او هېڅ وخت یې پر وړاندې بې پروایي نه ده کړې.
د والي ویاند عطالله خوګیاڼی وايي، که څه هم د پېښې عاملان له سیمې تښتېدلي، خو په خبره یې، کشفي او امنیتي ارګانونه یې پلټنې کوي څو ونیول شي او قانون ته وسپارل شي.
د یادونې ده چې تېره ورځ د افغانستان په ډېری ولایتونو کې د پولیو ضد واکسین درې ورځنی کمپاین پیل شو چې نن یې دوهمه ده.