تاند(شنبه، د جوزا ۲۲) په کابل کې د پاکستان سفارت نن اعلان وکړ چې د کورونا وایرس له کبله د وضعیت د خرابېدو په خاطر په کابل کې خپله کونسلي برخه د یوې اوونۍ لپاره بندوي.
د پاکستان د سفارت له لوري په خپره شوې خبرپاڼه کې ویل شوي چې د روان جون له ۱۳ یعني سبانۍ یکشنبې څخه د جون تر ۱۷ پورې به د دوی کونسلي څانګه بنده وي.
کونسلي څانګه وېزه صادروي او عموماً په کابل کې د پاکستان د سفارت پر کونسلي څانګې د مراجعینو ګڼه ګوڼه خورا ډېره وي.
د پاکستان سفارت په عین حال کې ویلي چې په انلاین بڼه به د وېزې ورکولو ته دوام ورکړي.
دغه سفارت سره له دې چې ویلي چې د جون تر ۱۷ پورې به د سفارت کونسلي څانګه بنده وي، دا یادونه هم کړې چې د جون په ۱۷ به پرېکړه وکړي چې کونسلي څانګه پرانیزي او که نه.