تاند ( جمعه، د جوزا ۲۱) د افغانستان د فوټبال ملي لوبډله د فوټبال نړیوال جام او د اسیا د اتلولۍ جام ته د لارموندنې په موخه د پیل شویو لوبو په دوام نن د عمان فوټبال ملي لوبډلې سره لوبه لري.
د افغانستان د فوټبال فدراسیون وایي، چې دا لوبه به د افغانستان په وخت د شپې په نهه بجې او ۴۰ دقیقو سره پیل شي، چې په خبره یې افغان لوبغاړو ورته پوره چمتووالی نیولی دی.
د روانو سیالیو په لړ کې افغان لوبډلې له دې وړاندې د بنګله دېش خلاف سیالۍ کې لوبه یو یو مساوي پای ته ورسوله.
د یادونې ده، چې له دې لوبې وروسته به د افغانستان فوټبال ملي لوبډله د روانې جون میاشتې په ۱۵مه نېټه خپله درېیمه لوبه د هند پر وړاندې ترسره کړي.