تاند (سه شنبه د جوزا ۱۷مه) افغان ځواکونو له تېرې شپې راهیسې په غزني، فراه او پکتیکا ولایتونو کې ۲۷ طالبان وژلي او ۷ نور یې ټپیان کړي دي.
افغان امنیتي چارواکي وایي، د مخامخ جګړې پر مهال یې د غزني په آبنده ولسوالي کې ۱۴ طالبان وژلي او ۷ یې ټپیان کړي، د فراه په بالابلوک کې یې ۱۰ طالبان وژلي، چې یو یې مهم قومندان دی او د پکتیکا د جاني خیلو په ژیړۍ سیمه کې یې د موخیزو عملیاتو په پایله کې د یو سرګروپ نقیب الله په ګډون درې طالب وسله وال وژلي دي.
د سرچینې د مالوماتو له مخې په یادو نښتو کې یې ګڼ شمېر سیمې د طالبانو او د دوی د ماینونو له شتون څخه پاکې کړي، په غزني او فراه ولایتونو کې یې د امنیتي پوستو د سقوط مخه نیولې او د بې ګناه ملکي کسانو د مرګ ژوبلې مخنیوی یې هم کړی دی.
سرچینې د غزني په آبنده ولسوالي کې د څلور سرتیرو او ولسي پاڅون والو د وژل کېدو خبر هم ورکړی دی.
دا په داسې حال کې ده چې د ارزګان ولایت چارواکي په چوري ولسوالي کې د تازه دمو سرتېرو په مټ طالبانو ته د سختې مرګ ژوبلې د اړولو ادعا کوي.