تاند ( سې شنبه، د جوزا ۱۸ مه ) د افغانستان د حج اوقافو وزارت وایي، سبا د افغانستان او پاکستان دیني عالمان د افغان سولې په اړه ګډه ناسته کوي.
د دې وزارت وياند فضل محمد حسیني وایي، په دې ناسته کې به د افغانستان او پاکستان د مشهورو علماوو ترڅنګ د اسلامي همکاريو سازمان ځينې غړي، هلته د افغانستان او پاکستان سفيران او د دواړو هېوادونو د حج اوقافو وزيران ګډون ولري.
د حسیني په وینا، دغه ناسته به د یوې ورځې لپاره د سعودي عربستان په کوربتوب او رابطه عالم اسلامي بنسټ تر څار لاندې تر سره شي.
د افغانستان د حج اوقافو وزارت دغه راز زیاتوي چې دا ناسته د سعودي عربستان په مکې ښار کې په انلاين بڼه جوړیږي خو ځيني چارواکي به د ګډون لپاره دغه هېواد ته سفر هم وکړي.
دا په داسې حال کې ده چې له دې وړاندې هم د افغان سولې په اړه د اسلامي هېوادونو علماوو ناستې تر سره کړي او په افغانستان کې یې روانه جګړه د اسلام له نظره ناروا بللې ده.
د دې ترڅنګ د نړۍ نورو ګڼو اسلامي ګوندونو او هېوادونو هم په ځلونه ځلونه د غونډو او اعلامیو په ترڅ کې په افغانستان کې د طالبانو جګړه نا مشروع بللې؛ خو طالبانو یې پر خبرو غوږ نه دی ګرولی.