تاند (دوشنبه د جوزا ۱۷مه) د هرات ولایت د کرنې او مالداري ریاست چارواکو ویلي چې هلته سږ کال پر ۱۰۰ جریبه ځمکه ځمکني توتان کرل شوي چې ښه حاصلات به ورکړي.
د یاد ولایت د کرنې ریاست سرپرست بشیراحمد احمدي ویلي چې تېر کال هلته د ځمکني توتان ۱۴۰ مټریک ټنه وو، چې سږکال به دا شمېره څو برابره لوړه شي.
د مالوماتو له مخې اوس مهال د هېواد په بازارونو کې د یو کیلو ځمکنیو توتانو بیه له ۲۰۰ څخه نیولې تر ۲۵۰ افغانیو پورې ده.
د هرات ځمکني توتان د نیمروز، غزني، فراه، کندهار او بادغیس ولایتونو بازارونو ته هم استول کېږي.
افغانستان د ځمکنيو توتانو د کرکیلې لپاره مناسبه هوا او اوبه لري چې سږ کال د هېواد په ځينو برخو په ځانګړې توګه کندهار او ننګرهار کې یې کرکېله پراخه شوې ده.
روغتیاپالان وایي، ځمکني توتان د ويټامين سي ترڅنګ په خپل ترکيب کې نور ګڼ شمېر ويټامينونه هم لري چې د انسان د روغتيا لپاره ډیر ګټور دي.